ဟေ့ဒီမှာ ဒီမှာ
ဒီနေ့ ဆိုတာ မနေ့တုန်းက ရဲ့ မနက်ဖြန်လေ
ကိုယ့်ကိုများ အနာဂတ်မှာရပ်နေတယ်ထင်လို့လား
မနေ့က နဲ့ မနက်ဖြန် သဏ္ဍာန် သိပ်မတူလည်း ဟန်နဲ့ ပုံစံကွဲမသွားပါဘူးကွယ့်
မနက်နေ့လည်ည ပြီးတော့ စားကြသောက်ကြ ရုန်းကန်ကြနဲ့ အတူတူပါပဲ
ငါ့အတွက်တော့ မနေ့ကနဲ့ ဒီနေ့ ရုပ်ကလေးကွဲသွားတာ အသက်ကလေးကွာသွားတာကလွဲလို့
အကုန်တူတူပါပဲ
စိုးရွံ့မနေပါနဲ့ ကောင်းကင်ကို ရဲရဲဝံ့ဝံ့မော့ကြည့်လိုက်စမ်းပါ
အဲဒီမှာ ငါ့နှလုံးသား မိုးရွာချနေတယ်လေ
အသံမထွက်ဘူး ဘယ်သူ့ကို စိုရွှဲမသွားစေဘူး
ဒါပေမယ့် နင်လိုချင်ရင် နင့်အတွက်တော့ ငါ့မိုးရည်စက်တွေနဲ့ အေးမြစေနိုင်ပါတယ်လေ။
မင်းမတွေ့သေးရင် သေချာကြည့်ကြည့်ပါ
ဟိုးမိုးကုတ်စက်ဝိုင်းရဲ့ သက်တန့်တွေကြားတနေရာမှာ
ငါ့နှလုံးသားရှိနေတယ်
မင်းလှတယ်လို့ပြောတဲ့ သက်တန့်အတွက်
ငါ့နှလုံးသားမှာ မိုးရေတွေစိုရွှဲ နေကျဲကျဲတောက်ပူပေးခဲ့ရတယ်။
ပြီးတော့
ငါ့အတွက်တနေရာစာ ဘာလဲ
တိတ်တဆိတ်နင်နှင်ထုတ် ဟိုးမိုးကုတ်စက်ဝိုင်းအစွန်းအထိကို
ငါဆုတ်သွားရတယ်။
ငါ့အတွက်တော့ အတိတ် နဲ့ အနာဂတ် ဘာမှ မပတ်သက်သလို
ဘာမှလည်း ထူးမလာသလိုပါဘဲ
ခုတော့ ပစ္စုပန်မှာပဲ တောင့်တောင့်ကြီးရပ်လို့ပေါ့
အိပ်မက်တောင် ရဲရဲမမက်ရဲတော့တဲ့ ဘဝ
မနက်ဖြန်အတွက် မျက်ရည်ကျမှ သိလိုက်ရတယ်။
တောင်းပန်ပါတယ် ဒီတညတော့ ကောင်းကောင်းအိပ်စက်ပါရစေ......
ဘာဖြစ်လို့လည်းဆိုတော့
ငါနင့်ကို ချစ်လွန်းမိတယ်လေ.......
လူမော်
(၂၀၀၉ နိုဝင်ဘာ ၁၈)
