ဟောဒီ အော်သံအောက်က
"သက်သာ" ဆိုတဲ့ အနေအထားတခုမှာ
သက်ပြင်းတွေ ခါခါချ
ငါ ညည အိပ်ရေးပျက်ရပါ့ပကော....
ခြေဆစ်လေးတွေကို
ရေအေးထဲ စိမ်
အတွေးတိမ်တွေကို ပုတ်ချ
ကမ်းမမြင် လမ်းမမြင်မှာ
ငါ ရုတ်တရက် လန့်နိုးလာရပြန်ပါ့ပကော.......
အသွေးတွေ အသားတွေ
ရင်ဘတ်ထဲက အကြောင်း
ဟောင်းသွားမစိုးလို့
ခဏ ချန်ထားကြရအောင်
ငါ့ကိုယ်လည်း လှောင်ချင်လှောင်ပါ
ဘဝကိုလည်း ပြောင်ချင်ပြောင်ပါ
ခဏတာဆိုတာ စက္ကန့်လား မိနစ်လား နာရီလား ရက်တွေ နှစ်တွေလား
အဲဒါ ငါတို့ လိုအပ်ချက်အပေါ်မှာ မူတည်လိမ့်မယ်.....
လက်ဗလာနဲ့ လာခဲ့သူအဖို့
တောင်းခံလာသူအတွက်
အသက်နဲ့ ခန္ဓာပဲ ကျန်တော့တယ်
မြင့်မြတ်တယ်ဆိုတဲ့ အရာရာက
မည်းမှောင် တိမ်ဝါး
ငါ့ ပါးစပ်လည်း ဒီရေကြောင့် ခါးလှပြီ.........
သစ္စာ ခါးခါးက ဒီနားမှာထား
မေတ္တာအချစ်စစ်က ဒီခုံမှာတင်
ရမ္မက်ကြောင့် ဖောက်ပြားခြင်းတွေကို
ဟိုး Trash Bin ထဲ ပစ်တင်လိုက်တယ်
မင်းတို့ ကောက်ယူလိုက သွားကောက်
ငါ့ အနာဂတ်က ဖိတ်ဖိတ်တောက် မနေလည်း
ငါ့အပြုံးက အရိပ်မည်းတွေအောက်မှာ လက်တယ်
အသက်ရှုစရာမလိုဘူး
နှလုံးခုန်စရာမလိုဘူး
ဒီဒေသဟာ ငါတို့ "သက်သာ" အနေအထားကြောင့် နေ့တွေညတွေလည်း ပါးတယ်
သူငယ်ချင်း......
နေဦး
(၂၀၁၀ နိုဝင်ဘာ ၆၊ နေ့လည် ၁၁း၅၂)
