သွေးချင်းနီးဖို့ထင့်
ဒီအရက်တခွက်ကို
ကျွန်တော်တို့ တူတူသောက်ကြတယ်မေမေ
အဲဒီအထဲမှာ
ခါးသက်သက် အယ်ကိုဟော တပက်လည်း ပါတယ်
ညို့သက်သက် ဆား အပွင့် လက်တပွတ်လည်း ပါတယ်
အရည်ရွှဲရွှဲ သံပုရာတစိတ်လည်း ပါတယ်
မာန်တွေထနေတဲ့ သကြားတဇွန်းလည်း ပါတယ်....
ကျွန်တော်တို့ သွေးနီးဖို့
ဒီအရက်ခွက်ကိုတူတူသောက်ခဲ့တုန်းက
သစ္စာကိုပြိုင်တူဆိုဖို့ မေ့ကျန်ခဲ့တယ် မေမေ
မေတ္တာအဆိပ်ကို တစက်လောက် ထည့်ဖို့မေ့ကျန်ခဲ့တယ်
အသည်းကျွမ်းကျွမ်း တဖတ်လောက်ကို အမြည်းလုပ်ဖို့မေ့ကျန်ခဲ့တယ်
မေမေ
ဒီအရက်တခွက်ကို တူတူသောက်ခဲ့တာ
ကျွန်တော်တို့ မှားတယ်တဲ့လား
လူတွေ အများရှေ့မှာပါ မေမေ
လက်ချင်းချိတ်ခဲ့ကြတယ်
ဘေးချင်းကပ်ထိုင်ခဲ့ကြတယ်
ရွှန်းရွှန်းစားစားကြည့်ခဲ့ကြတယ်
ပျော်ရွှင်မှုတွေကို ဓားတလက်နဲ့တူတူ ခွဲပစ်ခဲ့ကြတယ်
မေမေ
ဒီအရက်ခွက်ကို ကျွန်တော်တို့ နှစ်ယောက်
ကြည်ကြည်ဖြူဖြူသောက်ခဲ့ကြတပါ မေမေ
လက်ချင်းချိတ်ပြီး ရဲရဲတူတူသောက်ခဲ့ကြတာပါ မေမေ
မီးကို အမှောင်ချပြီး သောက်ခဲ့ကြတာ မေမေ
နှုတ်ခမ်းက နှစ်နှစ်ခြိုက်ခြိုက်နဲ့ ရှိုက်မက်ခဲ့ကြပါ မေမေ
မေမေ
ဟောဒီ ခွက်တခွက်ထဲက အရက်တွေ
ကျွန်တော်တို့ သွေးတွေထဲ ပျံ့သွားရုံနဲ့
သွေးချင်းနီးခဲ့ပါသလား မေမေ
သွေးချင်းနီးမနီးထက်
ကျွန်တော့်လက်မှာတော့ သွေးချင်းနီခဲ့တယ် မေမေ
မေမေ
အရက်တခွက်တူတူသောက်ရုံထက်
သား အချိုရည်ပေါ့ပေါ့လေးနဲ့ပဲ မယစ်မမူးနေချင်တယ် မေမေ
သားအတွက် ချိုချဉ်ငံခါး အရသာတွေ မများလည်းနေပါ မေမေ
သား ဟောဒီရိုးရိုးသားသားလေးနဲ့ လိမ္မော်ခွံလေးတွေထက်မှာပဲ မျောနေပါရစေ မေမေ
အဲဒီနေ့က မေမေ
သား ဟောဒီအရက်တခွက် သူနဲ့တူတူသောက်ဖြစ်ခဲ့တယ်
သူ ဆင့်ကာ ဆင့်ကာလည်း အရက်ခွက်တွေ သောက်ခဲ့တယ်တဲ့လေ
သား မသိခဲ့တာပါ မေမေ
လိုအပ်တာထက် အမူးလွန်တာ မှားတတ်မှန်း သား သတိမပေးခဲ့မိဘူး
လိုချင်စိတ်ထက် ဆန္ဒကိုချိုးနှိမ်တတ်မှ
အမှန်အစစ်ဆိုတာ သား သတိမပေးခဲ့မိဘူး
ခုတော့ မေမေ
သားလက်မှာ ဝိုင်အနီတွေ စွန်းပေနေတယ်
ဒါ ဖျက်လို့လည်း မရနိုင်တော့ဘူး
သားလက်ထဲမှာ အရက်ကို တပုလင်းလုံးစာ ကိုင်ထားတယ်မေမေ
မေမေ အဲဒီနေ့က
သားတို့ လက်ချင်းယှက်လို့
ဟောဒီတခွက်ထဲက အရက်ကိုပဲ
သွေးချင်းနီးဖို့ တူမျှ သောက်ခဲ့ကြတယ် မေမေ.........
နေဦး
(သြဂုတ် ၂၈ ၂၀၁၀)
("လမ်းကြား" ebook ကဗျာ စာအုပ်မှ)
